Бөтә яңылыҡтар

Мөғжизәле нур ебе

Нәрисә УЙЫЛДАНОВА, Әбйәлил районының Рауил мәктәбе уҡытыусыһы.

Айлы төндә сығып күккә баҡтым,

Серле йондоҙҙарға күҙ аттым.

Йыһан серҙәренә, ҡөҙрәтенә,

Иҫ-аҡылым китеп, шаҡ ҡаттым.

Илаһи бер нурлы, серле епте

Эй, Хоҙайым, бүләк иттеме?..

Илаһи ла күктең мөғжизәһе

Күңел түрҙәремә үттеме?..

Шул нурҙан яралған нескә епте

Ҡулдарыма алып сираттым.

Йомарлаған ап-аҡ йомғағымды

Биҙәк һала-һала тағаттым.

Биҙәктәрҙән ҡойған нағышымды

Кешеләргә илтеп еткерҙем.

Хоҙай ҡөҙрәтенән ебәрелгән,

Нурлы ептән торған хистәрем.

Әлдә Хоҙай шәлкем-шәлкем нурын

Бирә ептәй нескә күңелгә.

Шул моңдарҙан тыуа шиғырҙарым –

Биҙәктәргә генә төрөнгән…

Саф хистәрҙән генә үрелгән…
Нәрисә УЙЫЛДАНОВА,
Әбйәлил районының Рауил мәктәбе уҡытыусыһы.