+1 °С
Болотло
Бөтә яңылыҡтар
Башҡорт теле һәм әҙәбиәте
27 Август 2019, 16:29
Ирәмәлем – халҡым маяғы!
Журнал уҡыусылар ижады
Ирәмәлем – халҡым маяғы!
Ҡояш беҙҙә Ирәмәлдән ҡалҡа,
Алһыулатып таңда офоҡто.
Устарыма йыйып алғым килә
Таңда көмөш төҫлө ысыҡты.
Ер кендеге – изге Ирәмәлем,
Урал йөрәгендә хазина.
Таңда бында ҡоштар ҡағылалар
Тәбиғәттең моңло сазына.
Ирәмәлдең ташлы күкрәгенән
Ярҙар ярып сыға Яйығым.
Уралымда – милләтемдең көсө,
Ирәмәлем – халҡым маяғы!
Ирәмәлдә тыуған ир затымын,
Тыуған ерем – йәнем ҡалҡаны.
Һәр йөрәккә дарман, өмөт һибә
Ал ҡояштың тәүге ялҡыны.
Инәйемә
Көйлә әле бала саҡтағылай
Йәнгә һеңгән бишек йырыңды.
Һырҙар һыҙған уйсан ҡарашыңдан
Тоям, инәй, һөйөү нурыңды.
Ҡулдарың да һаман шулай йомшаҡ,
Ҡосағыңа ғына һыймайым.
Алдарыңа ятып иркәләргә
Хәҙер инде, инәй, ҡыймайым.
Ир ҡорона күптән ингәнмен дә,
Мин сыныҡҡан ныҡлы ҡоросмон.
Йылы һүҙҙе һирәк әйтәмендер,
Кисер, инәй, бер аҙ ҡырыҫмын.
Һинең алда минең бурыстарым
Бөтә тауҙан бейек Ерҙәге.
Инәйгенәм – минең тормошомдоң
Иң затлы ла сағыу биҙәге.
Көйлә әле, инәй, бишек йырың,
Бала саҡҡа илтер моң да ул.
Күкрәгеңә башым һалайым да,
Йәндәремдә тыныр мең дауыл.
Онотмайыҡ: ғәзиз Уралымдың
Һәр талынан әрнеп ҡан тама!
Ҡалай ғына алйот булғанмын да,
Бер ҡатлылыҡ – минең йән дошман.
Был тормоштоң асылдары ҡаты:
Яһилдар күп Ерҙә бар дуҫтан.
Иманды беҙ ергә тапағанбыҙ,
Көнсөлдәргә ҡалған был донъя.
Кешеләрҙән кеше ҡаса хәҙер,
Араларға ҡороп таш ҡойма.
Уртаҡ һүҙҙән йыраҡ милләттәштәр
Үҙ усағын яңғыҙ әтмәләй.
Беҙҙең боғаҙҙарға йәбешкәнде
Күреп сәпәкәйләй әпкәләй.
Ҡандаштарға бысраҡ ташлайбыҙ ҙа,
Күңелебеҙ итә тантана.
Онотмайыҡ: ғәзиз Уралымдың
Һәр талынан әрнеп ҡан тама!
Аттар кешнәй
Сыңғырлатып ҡына аттар кешнәй,
Йондоҙло төн, күктә – ай-даға.
Ҡырпаҡ ҡарҙан лерт-лерт юртҡан өйөр
Аҡ юрғанға ҡайый ай-тамға.
Ҡайсы ҡолаҡ, ҡаты тояҡ аттар,
Эйәр күрмәй ҡалған тай-тулаҡ.
Ҡараңғыға оса, ҡау бауырлап,
Ирек тиеп, сапсып һәм тулап.
Өйөр рухы азатлыҡты көҫәй,
Мундаларҙа – еҙҙән ҡыңғырау.
Киң далала ирек эҙләп һаман
Башҡорт атҡайҙары сырҡырай.
Өйөр саба, ҡар бураны уйнай,
Елдең биткә һуға ҡойроғо.
Ирек көҫәп аттар һаман саба,
Ҡанат ҡуйғас рухтың бойороғо.
Фәнил БҮЛӘКОВ,
Учалы районының Иманғол
мәктәбе уҡытыусыһы.
Читайте нас:
© 2020-2024 Сайт издания "Башҡортостан уҡытыусыһы" Копирование информации сайта разрешено только с письменного согласия администрации.
Теркәү тураһындағы ПИ ФС 77‑70646‑сы таныҡлыҡ 2017 йылдың 15 авгусында Элемтә, информацион технологиялар һәм киң мәғлүмәт сараларын күҙәтеү буйынса федераль хеҙмәт идаралығы тарафынан бирелде.
Ижтимағи-педагогик һәм фәнни-методик айлыҡ журнал Общественно-педагогический и научно-методический ежемесячный журнал. Издается с 1920 года. Главный редактор: Каримов С.Г.
Телефон
8(347) 292-77-63
Электрон почта
Адресы
450079, Республика Башкортостан, г. Уфа, ул. 50-летия Октября, 13, Дом печати, 10 этаж
Редакция
8(347) 292-77-63
Ҡабул итеү бүлмәһе
8(347) 292-77-63
Хеҙмәттәшлек
8(347) 292-77-63