Ир әйләнеп ил табыр

Донъяға билдәле Илмән ҡурсаулығы ла ана ҡул һуҙымында ғына ята.  Был – аҫыл шағирә Кәтибә Кинйәбулатова иле. «Минең тыуған яғым – күлдәр лабиринты», – тип бик дөрөҫ атағайны ул бер әңгәмәһендә.

Беҙ яңыраҡ ҡына Арғужа, Сеңгерәй йылғаһын барып күргәйнек,  ә әле бына Еловое, –  тәбиғи ҡомартҡы – «Йылы күл» буйыда баҫып торабыҙ.

Еловое – Йылы күл – халҡыбыҙ биргән исем. Уның исеме лә есеменә тап килә. Сөнки күлдең һыуы  – йомшаҡ, йылы, шифалы. Картаға баҡһаң, Йылыгүл тирәләй  санаторийҙар, ял базалары һәм балалар лагерҙары – һауыҡтырғыстар – һаулыҡ йорттары ҡорт күселәй һырып алған. Был хәл йәнә ата-бабалар белеп ҡушҡан «шифалы күл» тигән  ысынбарлыҡты иҫбатлай.

«Тыуған илгә ни етә – ҡәҙерен белгән кешегә», – тиҙәр беҙҙең яҡта. Насип иткәс, йән-тән яҙып турист һуҡмағында күлдәр лабиринтын иңләйбеҙ. Йылыгүлдең йәндәй нурлы һыуына ҡойоноп, хозур тәбиғәте менән танышып, һыйлы еребеҙҙә һыйланып, уның мең дә бер шафаһын тойоп ҡайттыҡ.

Ҡамса МОРТАЗИН.