Эҙ ҡалдырыр аҫыл уҙаман

  Шәһит Хоҙайбирҙиндың йорт-музейында «Ҡайҙан һин, Матросов?», «Уҙамандарҙы эҙләйем», «Ҡылыс ҡында килешә» һ.б. китаптар авторы, Шәһит Хоҙайбирҙин һәм Муса Мортазин исемендәге премиялар лауреаты, билдәле яҙыусы һәм журналист Рәүеф Хәй улы Насыровтың тыуыуына 90 йыл тулыуға арналған хәтер кисәһе үтте. Сараны музей мөдире Зөлфирә Ҡарағужина йәнле итеп алып барҙы. Учалынан килгән яҡташтары, шулай уҡ ҡыҙы Гөлнара Рәүеф ҡыҙы, ейәне Илгиз Рәхимйәнов яҡты хәтирәләр менән иҫкә алды. Уҙаман (Рәүеф Насыровҡа)   Ғүмер ҙә тиһең, эй, был ғүмер, Кемдән генә ғүмер уҙмаған. Кейем дә генә тиһең — затлы-затһыҙ, Кемдә туҙған, кемдә туҙмаған. Йыр ҙа ғына тиһең, эй, моңло йыр, Кемдәр генә йырҙар һуҙмаған. Кем бар, кем юҡ бөгөн, үҙенән һуң Эҙ ҡалдырыр аҫыл уҙаман. Тарих та ғына төптәренә төшөп Уҙамандар эҙләп уҙамын. Шул уҙамандарҙы иҫләп уйға ҡалам, Көйгә һалып йырҙар һуҙамын: «Һин үҙең бит аҫыл бер уҙаман, Һин күктәргә сөйгән һүҙ — аман. Ерҙең юлын имен-аман үттең, Күк юлдарын, юлсы, уҙ аман». Уҙаман. Зөлфирә Ҡарағужинаның оло шәхесебеҙгә арнап яҙған шиғыры һәр кемдең йөрәгенә үтеп инде.

Эҙ ҡалдырыр аҫыл уҙаман