Бөтә яңылыҡтар

Удмурт кылъя но литературая элькун олимпиадалы йылпумъянъёс

Итоги республиканской олимпиады по удмуртскому языку и литературе

Анай кылъя но литературая элькун олимпиада, кылем арын сямен ик, радъямын вал Уфаысь К.А. Давлеткильдеев нимо художественной гимназиын. Олимпиада ортчиз 10 – 11 толшоре. Удмурт кылъя но литературая олимпиадае вуизы 4 ёросысь удмурт пиналъёс: Бурай, Калтасы, Татышлы но Янаул ёросъёсысь (кылем арын Балтач ёрос но пыриськиз). Туэ асьсэлэсь кужымзэс эскерыны öтемын вал VIII классысь дышетскисьёс но. Жаляса верано, XI классысь одӥг участник но öй вал. Озьыен, люкаськемын вал VIII, IX, X классъёсысь дышетскисьёс.
Олимпиада вань анай кылъёсъя (удмурт, мари, татар но чуваш) радъяськиз 3 этапен: викторина, сочинение но диалог. Жаляса верано, викториналы сётӥськиз 1 час гинэ. Удмурт пиналъёслы дыр öз тырмы ужъёссэс пумозяз быдэстыны. 1 – 3 ужъёс вал кылъя, 4 – 6 ужъёс – литературая, 7 уж – творческой (сётэм визькылъя басня гожтон), 8 уж – кылбурлы анализ. Дыр тырмыт луысал ке, туж тунсыко пуштросъем ужъёс пӧрмысалзы. Кылъя юанъёс кулэ каро вал огвыжыё кылъёсты, синтаксической разборез но текстлэсь стильёссэ тодэмез. Литературая – литературной терминъёсты, пöртэм произведениосысь текстъёсты тодэмез. Ваньмыз юанъёс – школьной программая.
Дышетӥсьёслы нош ик дэмлан сётэм потэ. Пиналъёс, кылбурлы анализ лэсьтыкузы, юрттӥсь юанъёслы гинэ валэктон сёто. Кылбурлы, прозаической текстысь люкетлы анализ лэсьтыны дышетоно огъя куронъёсъя, традиционной схемая. Соку таӵе эскеронлэн одӥг люкетэз но палэнэ уз кыльы. Дышетоно комплексной анализ лэсьтыны. Та уж юрттэ сочинение гожтыны но. Тужгес вылӥ дунъямын вал литературной материал вылэ пыкиськыса гожтэм сочинениос.
Сочиненилы сётӥськиз 3 час. Котькуд класслы дэмламын вал 3 тема. Тросэз дышетскисьёс бырйизы вордӥськем шаерлы сӥзем темаез, вал война сярысь гожтӥсьёс, одӥг уж сӥземын М. Коноваловлэн «Гаян» романэзлы – таиз уж тужгес кужмоез вал.
«Диалог» этап нырысьсэ пыртэмын вал олимпиадае. Нылпиос парен-парен пуксьыса вераськизы пöртэм темаосъя: «Муш утён», «Чорыган», «Мынам доре», «Уй кизилиос» но мукет. Та этапын дунъямын вал пиналъёслэн анай кылын вольыт но чебер вераськемзы. Удмурт пиналъёслы та уж туж капчиен сётӥськиз. Шöдӥське, удмурт семьяосын анай кыл утиське, дышетскисьёс доразы анай кылын верасько шуыса.
Олимпиадаын призёръёс луизы: Давлетова Елизавета, Янаул ёросысь Каймашабаш школаын VIII классын дышетскись (дышетӥсез – З.С. Ибраева); Идиятова Арнолия, Янаул ёросысь Максим школаын IX классын дышетскись (дышетӥсез – Л.Х. Магданова); Шакирова Полина, Татышлы ёросысь, Улысь Балтач школаын IX классын дышетскись (дышетӥсез – З.Т. Шарафутдинова); Садыков Ренат, Бурай районысь Новотазларово школаын X классын дышетскись (дышетӥсез – Р.И. Раянова)
IX но X классъёс пöлын вормисьёс тулыспал толэзе Башкир Элькунмылэсь данзэ утьыны вуылозы Ижкаре удмурт кылъя но литературая олимпиадалэн межрегиональной этапаз. Тани соос: Куснимарданова Есения, Янаул ёросысь Сандугач школаын IX классын дышетскись (дышетӥсез Султанахметова Л.Ф.), Сергеева Вилиана, Татышлы ёросысь Улысь Балтач школаын X классын дышетскись (дышетӥсез – З.Т. Шарафутдинова). VIII классысь дышетскисьёс пöлын вормиз Татышлы ёросысь Кальтяево школысь Гарифьянова Наталья (дышетӥсез – Л.А. Хазипова)
11 толшоре 16 часэ радъяськиз вормисьёсты данъян церемония. Та ужрадэ вуиз Башкортостан Республикаысьтымы удмурт национально-культурной центрлэн тöроез С.Г. Гарифуллин. Олимпиадае вуэм пиналъёс – вормисьёс но, участникъёс но – Салим Гарифулловичлэн киысьтыз басьтӥзы таукаронкылъёс но синпельлы кузьымъёс. Озьы ик таукаронкылъёсын пусъемын вал удмурт кылъя жюрилэн членъёсыз но олимпиадае вормисьёсты дасясь дышетӥсьёс.


О.Р. ДАВЛЕТОВА,
учитель удмуртского языка и литературы Каймашабашевской школы Янаульского района, председатель жюри


Читайте нас в