Бөтә яңылыҡтар

Анай кыл – асьмелэн узырлыкмы

Итоги олимпиады по удмуртскому языку и литературе

200 муртлэсь ятыр дышетскисьёсты люказ туэ анай кылъя но литературая элькун олимпиада. Нош ик шумпотыса пумитаз соосты Уфаысь К.А. Давлеткильдеев нимо художественной гимназия. Ужрад ортчиз 9 – 10 толшоре. Удмурт кылъя но литературая олимпиадае вуизы 4 ёросысь удмурт пиналъёс: Бурай, Калтасы, Татышлы но Янаул ёросъёсысь. Жаляса верано, Ермекей районысь участникъёс öз лыктэ, муниципальной этап отын радъямын ке но вал. Ваньзы люкаськизы 18 дышетскисьёс: VIII классысь 6 дышетскись, IX классысь – 6, X но XI классъёсысь быдэн 3.
Олимпиада вань анай кылъёсъя (удмурт, мари, татар но чуваш) радъяськиз 3 этапен: викторина, сочинение но диалог. Викториналы сётӥське 1 час. Котькуд класслы сётэмын 8 юан: 3 юан кылъя, 5 юан литературая. Туэ ужъёс кулэ каризы толэзь нимъёсты тодэмез, синтаксической разборез но текстлэсь стильёссэ тодэмез. Литературая юанъёс, кылем арын сямен, литературной терминъёсты, пöртэм произведениосысь текстъёсты тодэмез кулэ каро. Ваньмыз школьной программая.
Кыкетӥез уж – сочинение. Солы висъямын 3 час. IX – XI классъёсын дышетскисьёс ужзэс гожтӥзы сётэм литературной материалъёсъя – кылбурлы анализ. VIII классысь дышетскисьёс ужазы сётэм проблема бордын: «Дунне вылын нош ик всемирной потоп луоно. Тӥляд вань луонлыкты ковчеге басьтыны 3 книга удмурт кылын. Кыӵе 3 удмурт книгаез утьысалды вуоно поколениослы?». Гожтоно сочинение сётэм темая «Кыӵе 3 удмурт книгаез мон утьысал вуоно поколениослы?». Кылем ар ужъёсын ӵошатыса, туэ сочинениос ӟечгес гожтэмын вал. Арысь аре кылтӥрлык но пуштросэз ласянь сочинениос пöрмо золгес.
Диалоглы туэ сётмын вал таӵе темаос: «Шутэтскон нунал, кудӥз мынам тодам кылиз», «Мынам матысь эше», «Мынам яратоно дышетӥсе» – VIII класслы; «Тунсыко адямиен пумиськон», «Спорт. Кыӵе инты басьтэ со мынам улонам?», «Тунсыко профессия» – IX класслы; «Шудо адями. Кыӵе со?», «Коньдон адямиез шудо кароз-а?», «Мынам вуоно улонэ сярысь малпанъёсы» – X – XI классын дышетскисьёслы. Та этапын висъям потэ Ахметзянова Ольгаез (XI класс, Татышлы ёросысь Выльгурт школа), нылаш чебер но вольыт вераське удмурт литературной кылын. Пиналъёс вераськоназы трос куто ӟуч но диалектной кылъёсты, сыӵе ужъёс ичигес баллъёсын дунъямын вал.
Олимпиадаын призёръёс луизы: Мухаметзянова Ксения, Янаул ёросысь Шудек школаын VIII классысь дышетскись; Кунакбаев Дмитрий, Татышлы ёросысь Кальтяево школаын VIII классысь дышетскись; Мухаметгалиева Дарина, Калтасы ёросысь Большекачаково школаын IX классын дышетскись; Гарифьянова Наталья, Татышлы ёросысь Кальтяево школаын IX классысь ды­шетскись; Шаманаева Альбина, Янаул ёросысь Ямады школаын X классысь дышетскись; Ахметзянова Ольга, Татышлы ёросысь Выль Татышлы школаын XI классын дышетскись.
Удмурт кылъя но литературая элькун олимпиадаын вормисьёс луизы: Гараева Аделина, Янаул ёросысь Вуж Вараш школаысь VIII классын дышетскись; Давлетова Елизавета, Янаул ёросысь Каймашабаш школаысь IX классын дышетскись; Шакирова Полина, Татышлы ёросысь Улысь Балтач школаысь X классын дышетскись; Сергеева Вилиана, Татышлы ёросысь Улысь Балтач школаысь XI классын дышетскись.
Арысь аре ӟеч результатъёс возьмато Татышлы ёросысь Улысь Балтач школаысь лыктэм участникъёс, дышетӥсьсы – З.Т. Шарафутдинова. Туэ Зинаида Тимерьяновна 2 вормисьёсты дасяз.
Вормисьёсты тулыспал толэзе возьма Уд­мурт Элькунын ортчись удмурт кылъя но ли­­тературая межрегиональной олимпиада. Нылъёслы сӥзем потэ азинлык но вормонъёс.
Олимпиадаын вормисьёс пусъемын кузьымъёсын но дипломъёсын. Озьы ик вань удмурт пиналъёс Башкортостанысь Удмурт национально-культурной центрлэсь кузьымъёссэс басьтӥзы. Юри со понна олимпиадаез ворсась мероприятие вуизы С.Г. Гарифуллин, Центрлэн кивалтӥсез, но асьме элькунын потӥсь «Ошмес» газетын ужасьёс.

О.Р. ДАВЛЕТОВА,
учитель удмуртского языка и литературы Каймашабашевской школы
Янаульского района, председатель жюри