Вакытъёслэн гердзы: Андрей Гильмаевлэн веросъёсаз – удмурт калыклэн историез

Кызетӥ даурлэн кутсконаз удмуртъёслэн ас эсэпазы улонрадлыксы тӥямын вал. Совето власть соослэсь улонзэс пыраклы воштӥз: историлэн сюрес дуртӥз вамышъясь калык, солэн тулкымъяськись ӧраз донгемын вал. Пумтэм шуг-секытъёс но курадӟонъёс пыр потоно луиз гуртын улӥсь калыкмылы. 1960-тӥ аръёсы гинэ гурт улос ас ярдуръёсаз пуксьыны кутскиз. Вашкала дыръёсын ӵошатыса, ортчем даур герӟаськемын асьмелэн матысь ӵыжы- выжыосынымы: анай-атайёсынымы но песянай-песятайёсынымы. Соослэн верамъёссыя со вакытысь улонэз син азе пуктыны быгатӥськом. Но, дыр ортчемъя, ваньмыз азьло луэмез пумен вунэ, буёлъёс бездо. Пиналъёсмы троссэ уг но тодо ни, со сярысь уг но малпасько. Таӵе югдуре ӵапак юрттыны быгатэ чеберлыко литература. Ортчем вакытъёслэсь буёлъёссэс но шӧмзэс улӟыто историлы сӥзем литературной произведениос. Совето Союз дыръя удмурт литератураын калыкмылэсь граждан ож, колхозъёсты кылдытон, Быдӟым атыкай ож дыръя улонзэ возматон валтӥсь интыын вал. Но соку гожтэм произведениосын зэмос улон, соцреализм литературной амаллэн куронъёсызъя, чеберматыса адӟытэмын. Писательёс ӧз быгатэ совет идеологилы пумит мыныны, ас понназы мукет сямен малпазы ке но. Тросэз сюлмысь оскизы но, дыр, коммунистической партилэн дышетонэзлы. Перестройка вакытэ (1985 – 1991) гинэ литератураын югдур воштӥськиз. Соку кунысьтымы гожъяськисьёс, партийность принциплэсь куштӥськыса, зэмос улонэз возьматыны быгатӥзы. Камсьӧр удмуртъёслэн XX даурлэн шуго-леко вакытъёсаз улэмзылы сӥземын Андрей Гильмаевлэн веросъёсыз. Писательлэн геройёсызлэн, огшоры гуртын улӥсьёслэн, улонысьтызы учыръёс пыр син азе яркыт пуксё граждан ожмаськон, колхозъёс потон, война дыръя но со бӧрсьы гурт улон, гурт калыклэн со вакытъёсы сюлэмшугъяськонъёссы.
Андрей Васильевич Гильмаев (1938 – 2005), удмурт писатель но журналист, вордскиз но быдэ вуиз Башкир АССР-ысь Татышлы ёросысь Уразгильды гуртын. Вань улонэз солэн районысь но быдэс республикаысь удмуртъёсын герӟаськемын вал. 1972-тӥ арысен со Татышлы ёросысь удмурт кылын «Азьлань» район газетэз поттон бордын тыршиз, 1999-тӥ арысен Башкортостанын удмурт кылын потыны кутскем «Ошмес» республиканской газетэн кивалтӥз. Дышетскемезъя историк луэмез (Удмурт госпединститут), калыклэсь историзэ но сям-йылолъёссэ яратэмез юрттӥзы солы ӟеч шаерчи луыны но. Пересьёсын вераськыса, архив кагазъёс пӧлын бугыръяськыса, улосчиосызлэн азьвыл улэмзы сярысь тросгес тодэмез потӥз. Вань солэн Татышлы палась удмуртъёслэн вераськетсылы, историзылы но этнографизылы сӥзем научной но краеведческой ужъёсыз. Тодослыко конференциосы пыриськыса, аслаз малпанъёсыныз но шедьтосъёсыныз но люкиськылӥз. Но тросэныз соосын яратоно «Азьлань» но «Ошмес» газетъёсызлэн бамъёсаз лыдӟисьёсыз удмурт кылын тодматылӥз.
1994-тӥ арын Ижевскысь «Удмуртия» книгапоттонниын солэн «Вакытъёслэн гердзы» веросъёсыныз бичетэз печатламын вал. Книгалэн нимыз ик возьматэ ни со историен герӟаськемын шуыса. Озьыен, автор книгаезлэн пуштросэзлы туж тупась, сое яркыт возьматӥсь йыръян но шедьтӥз. Солэн аннотацияз тазьы шуыса гожтэмын: автор «маде шаерезлэн историысьтыз тужгес но секыт вакытъёсыз сярысь: граждан война, собере пыд йылэ султон аръёс, гуртын сютэм улон, Быдӟым Отечественной война но мукет».
Книгае пыртэм сизьым веросъёс писательлэн вордскем шаерезлэсь XX даурын ортчем сюрессэ возьмато. Нырысетӥез верос («Турнан дыр вал соку») даурлэн кутсконысьтыз граждан ожен ке герӟаськемын, берпуметӥез («Чебер кыз») – солэн пумысьтыз Афганистанын ожмаськонэ пыриськонэн. Веросъёсыз авторлэн вордскем шаерез сярысь шуыса верамез юнмато отын пумиськылӥсь диалект кылъёс, топонимъёс но этнографи тодметъёс. Лыдӟыны кутскыку ик син шоры йӧто Татышлы ёросысь удмурт топонимъёс: Бермуш но Варади шуръёс, Вукогурт, Вылынгурт, Выльгурт, Бальӟигурт но мукетъёсыз. Тросэз веросъёслэн сюжетъёссы Вукогуртэн герӟаськемын. Озьы нимало удмуртъёс Татышлы ёросысь Уразгильды гуртэз, кудаз А.В. Гильмаев вордскиз. Веросъёсын возьматэм Кузьнюк, Варади выж, Коньыкыр возь, Шординь но Изгуо ошмесъёс, Питырес кыр, Каргурезь но мукетъёсыз микротопонимъёс али но тодмо на гуртын туала улӥсьёслы. «Со селоын куамын-ньыльдон ар талэсь азьло волость кылдытӥллям, отын управа ужаны кутскем, уездысь земство больница но школа усьтэм» шуыса гожтэмъя, син азе пуктӥськом XX даурлэн кутсконаз волостьлэн шор гуртэз но туала дыре райцентр луись Вылысь Татышлыез (веросъёсын – Вылынгурт). «Секыт гужем» веросын возьматэм «Дэмен» колхоз но тодматэ гожтослэн сюжетэзлэнь азинскон интыеныз. Огаз веросын пусъем «Азьлань» газет но со сярысь ик вера. Авторлэн шаерчи луэмез, истори эскеронъёслэсь методиказэс тодэмез, веросъёсысь учыръёс зэмос улонысь басьтэмын, дыр, шуыса малпанэз юнмато. Соос сярысь автор тодӥз, дыр, пересьёсын вераськыса, нош война бере улосэн со ас синмыныз адӟыса, ас вылаз шӧдыса ик тодмо.
Бичетысь веросъёс пӧртэм аръёсы кылдытэмын. «Турнан дыр вал соку» но «Секыт гужем» 1986 – 1989-тӥ аръёсы гожтэмын вылӥллям ке, мукетъёсыз («Чебер кызэз» лыдэ басьтытэк) – 1972 – 1984-тӥ аръёсы. Веросъёсты пӧртэм вакытэ кылдытэм шӧдӥське отын возьматэм учыръёс пумысен авторлэн позициезъя но. Совет идеология кузёяськон вакытэ, солэн куронъёсызлы тупасьтэм малпанъёсты печатланы ӧй луысал. Соин ик со вакытэ гожтэм произведениосын калыклэн адӟонъёсыз партилэн линиезлы пумит луись «тушмонъёслэн» ужъёсынызы гинэ валэктӥсько. Соос ке ӧй пумитъяськысалзы, совето улон туж каньыл луысал. Нош перестройка вакытэ гожтэмъёсаз, шӧдӥське ни советской история шоры выль сямен учкон.
Кылсярысь, «Куинь гинэ нунал» веросын колхоз улонлы пумит луись кулакъёс но соосын герӟаськем «всякой разнойёс» сьӧд буёлъёсын гинэ суредамын. Веросэз гожтыкуз, автор ӧз но малпаськы, дыр, ма пумысен соос совет властьлы пумит луизы шуыса. Вукогуртысь Миклай байлэсь ваньбурзэ колхозчиослэн асэстэмзы («Кылем толалтэ колхоз кылдэм бере, солэсь куд-ог ваньбурзэ басьтӥзы…»), соцреализмлэн куронъёсызъя гожтэм произведениын, умой ужрадэн адӟытэмын. Но адямилыко мерттэтъёсын со выллем учыръёс шоры учкыса, совето вакыт дыръя ватэм документъёсты эскерыса, со ужась адямилэсь улоссэ таркан, ваньбурзэ талан луэ шуыса валаськом. Ваньзы комсомолецъёс но соос выллем активистъёс, веросын возьматэм геройёс (кылсярысь, комсомоллэн ёзчиез Митрей) выллем чылкыт сюлмо адямиос но луиллямтэ шуыса тодӥськом ни. Митрей комсомолец кадь ик соос куанеръёс пӧлысь луиллям, кивалтэт но партия косэм улсын, гуртысь узыръёслы соос улыны маза сётӥллямтэ. Кулакъёслэн но советской азьветлӥсьёслэн образъёссы соцреализм манерен ке но пӧрмытэмын, огшоры калыклэн малпанъёсыз зэмлыклы матын карыса сётэмын. Демьянлэн «Толон тӥ соосты кышкатӥды, нош туннэ соос асьтэлэсь кукъёстэс тӥяны быгатозы. Марлы шумпотонэз?» шуыса вазиськемысьтыз шӧдӥськом калыклэсь соослэн нюръяськемзы шоры учкемзэ. «Адӟом ай. Оло комсомолтэк но улом». Но Демьянлэн пиез Тэмыр, озьы ке но, комсомолэ пыре!
«Турнан дыр вал соку» веросын авторлэн ортчем событиос шоры учконэзлэсь воштӥськемзэ шӧдӥськом ни. Гордъёс азьло сямен ик умоен гинэ ке но возьматэмын, тӧдьыос ини «кык пыдо изьверъёс» ке но шуэмын, соослэн адямилыко луэмзы но пусъемын: «Оло гуртэз тодаз лыктӥз. Оло солэн но нылыз вань. Надя шоры учке но, сое син азяз пуктэ, тодаз вае, ӵошатэ, луоз». Веросысь Камайлэн «Тӧдьы-а, горд-а – асьме понна ваньмыз одӥг, огзы но кулэ ӧвӧл. Музъеммес, валъёсмес гинэ медаз басьтэ, асьмемыз сютэм медаз кельтэ» шуыса верамысьтыз авторлэн аслаз малпанъёсыз шӧдӥсько кадь ини. Но озьы ке но, Камайлэн нылызлэн Надялэн гордъёслы дурбасьтэмез умоен возьматэмын…
«Секыт гужемын» авторлэн позициез чутрак воштӥськемын ни. Геройёслэн шугадӟонъёссы тушмонъёс луонэн валэктэмын ӧвӧл ни, соос кенешо властьлэн тырмымтэосызьтыз ик пото шуыса адӟытэмын. 1947-тӥ арын сютэм улон инкуазь кӧс луэмен но ю удалтымтэен гинэ герӟамын ӧвӧл, колхоз но район начальникъёслэн кӧттырмостэмлыксылэн, огшоры колхозникъёслы пумит луэмзылэн емышез но со. Граждан ож, колхозэ кужмысь пыртон, фашистъёсын ожмаськон пыр потэм калыкез киултыса возё колхоз предъёс, бригадиръёс, бригадной охранникъёс, налоговой агентъёс, уполминзагъёс, заёмъя уполномоченнойёс но мукетъёсыз со выллемъёс. Колхозын ужасьёслы трудоденьёссы понна пызь но ю сёто, нош налогъёс но заёмъёс понна уксё куро. «Налоглы тыроно, заёмлы тыроно, вакытаз тырыны быгатӥллямтэ ке, эшшо недоимкаез люкаське». «Толалтэ коть пудозэс вузало, мукет мар ке базаре потто, нош гужем копак ёрмоно. Нош тырыны кулэ». Со сяна «гуртысьтымы котькуд семья араз ньыльдон кило сӥль, сю курег пуз, кык пудо ку тырыны кулэ. Пудоед, тылобурдоед вань-а, ӧвӧл-а всё равно тыроно. Скал вордӥськод ке, кык сю витьтон – куинь сю литр йӧл сётоно». Соиз гинэ уг тырмы, сютэм кулонлэсь утиськон понна колхоз бусыысь шепъёс яке кисы тыр ю тысь «лушкад» ке, совет законъёсъя пытсэтэ пукто: «Тӥни миым Катьырна кенакез одӥг кисы кӧжы ваемез понна судить каризы, тюрьмае пуктӥзы…». Соин ик кӧтсэс турын-куарен тыроно луо. Пумитъяськид ке, милиция ӧтьыто яке МГБ (госбезопасностья министерство) ик тынэсьтыд «уждэ» эскере.
«Рабочийёслэн но крестьянъёслэн эрико куназы» сыӵе югдур кылдэмен ик, огшоры ужась калык «Малы ваньзылы огкадь улон ӧвӧл меда?», «Малы сыӵе ӟеч адямиосты озьы каро?» шуыса аслэсьтыз ачиз юаз ке но, ваньзэ сое чидаса улоно луиз: «Араны потӥз со нуналэ гурт калык». Но писатель совето властез ӧз курла, солэсь шекъёссэ гинэ адӟытыны выриз.
Удмурт калыкмылэн ортчем сюресэз сярысь малпаськонъёсы уськытэм сяна, А.В. Гильмаевлэн веросъёсыз возьматэм вакытъёсысь калыклэсь улонзэ син азе пуктыто, солэсь воштӥськемзэ возьмато. Кылсярысь, сю ар талэсь азьло Камсьӧрысь удмурт гуртъёсын ог-кык адями гинэ ӟуч сямен валам, нош туала дыре куд-огез удмурт кылзэ но вунэтэмъяськыса ветлэ ни. Пиналъёс гуждорын арганэн шудыса, удмурт кырӟанъёсты кырӟаса ӝыт шудонъёс ортчытъяллям, туала егитъёс дискотекаязы люкаськизы ке но, удмурт гуръёсты кулэ уг каро ни… Ог вакытэ удмурт гуртъёсын семилеткаосты быдтэмъёсты «грамотной муртэн лыдъяло» вылэм, нош али вылӥ дышетскон басьтыса, удмурт сямъёссэс но кылзэс кулэтэмен адӟо. Колхозын ужасьёслэн бусыын уриськемзы, отчы кыед поттамзы, уин черодэн вал утемзы сярысь тодӥсьёс но ӧжыт гинэ кылизы на.
Андрей Гильмаевлэн веросъёсыз чебер удмурт кылын гожтэмын, ас вакытазы кутӥскем кылъёс (архаизмъёс но советизмъёс) но, возьматэм дыръёслэсь шӧмзэс яркыт возьмато. Уже кутэм кылтӥрлык амалъёс авторлэсь усто прозаик луэмзэ возьмато: «Каргурезь сьӧрысь потэм шундылэн сиосыз нырысь ик шур дурын будӥсь писпуослэсь лысвуо куаръёссэс зарнивуазы, собере гуртысь корка липетъёсы йӧтскизы, быдэс котырез югытак каризы», «Демьян, Тэмыр азбаразы шунды сиосын ӵош пыризы», «Уй но ортче ини – тӥни шунды ӝужан палась югектыса лыктэ», «Гужем уж ваньзэс муш палэпе кадь огазе люка» но мукетъёсыз. Пичи Толялэн «Кӧт сюма, анай… Пичи гинэ, чумер быдӟа ке но мед сётозы. Нянь сием потэ» шуэмез шимес сютэмлыкез ас вылад шӧдымон возьматэ. Пичи гинэ «Пумиськон – келян» этюд но А. Гильмаевлэсь литератураысь покчи жанръёслэн мастерзы луэмзэ возьматэ: Байдиналэсь но Петырлэсь весяклы люкиськемзэс валэктӥсь кылъёстэк но валаськом, та яркыт суред ик возьматэ ожмаськонлэсь быдӟым трагедизэ.
А.В. Гильмаевлэн «Вакытъёслэн гердзы» книгаяз пыртэм веросъёссэ Башкириысь удмурт кылъя но литературая дышетӥсьёс одно ик ужазы мед кутозы вылэм. Дышетскись нылпиослы соос удмурт калыкмылэсь XX дауре ортчем секыт сюрессэ валаны юрттозы, ӵыжы-выжыоссэс гажан сям пыӵатозы.

Литература
Гильмаев А.В. Вакытъёслэн гердзы. Веросъёс. – Ижевск: Удмуртия, 1994. – 72 б.
Гильмаев Андрей Васильевич // Удмурты Башкортостана. Краеведческий сборник. – Уфа: Эдвис, 2009. – С. 87 – 90.
Бадретдинов У.Ш. Башкортостанысь удмурт писательёс но журналистъёс // «Башҡортостан уҡытыусыhы» («Учитель Башкортостана»). – 2009. – №5. – С. 52 – 54.