Тевде апелиця ава

Иванова Вера Петровна сельведь марто ледстни се стака шкадонть. Кода ушодсь войнась, велень весе цёраломантне тусть фронтов. Паксятнесэ, кудоютконь тевтнесэ сынст полавтызь аватне ды эйкакштнэ.
Од тейтерьканть, Иванова Верань, кармавтызь кочкамс: кадовомс колхозс ды озамс тракторс эли туемс торфонь таргамо. Тейтересь кочкизе васенценть. Сон прядсь трактористэнь курсат ды кадовсь колхозс! Те важодемась ульнесь пек стака. Верань кедензэ свал ульнесть кирьга видьс мазут потсо. Ансяк весе чарькодсть: фронтонтень эряви кши! Важодсть ашолгадомасто чоподас, пситнень ды якшамотнень лангс апак вано. Кодаткак пеняцямот стакачитнень лангс арасельть.
Кото иеть важодсь Вера колхозсо трактористкакс. Фронтсто аламонь-аламонь велявтсть живстэ кадовозь цёратне. Сынь стамбарнэ кундасть велень сэтьме эрямонь тевтненень. Вераньгак ютавтызь важодеме тракторной бригадас учётчицакс.
Эрьва таргоне тейтересь алашасо якась отчёт марто татарвелев – Аитовав, тосто сакшныль солярка марто.
Седе тов Вера Петровна пенсияв лисемазонзо важодсь почтань прявтокс. Те мазый, паро, чевте седей, важодемадо апелиця аванть содасызь аволь ансяк эсенек буесэ, васоло сонзэ томбалеяк. Зярс ульнесь шумбра, Вера Петровна сакшнось школав ды куватьс ёвтнекшнесь эйкакштнэнень эсь эрямодонзо.
Ламо иень важодемань кис те виев аванть казизь медальсэ ды орденсэ. Монь койсэ, Изнямо чинь малавгавтыцятне, – куш толонь паксясо тюрицятне, куш тылсэ важодицятне, – Геройть.