Бөтә яңылыҡтар

Стихи удмуртских поэтов

урт кыл(Удмуртский язык)

Удмурт кыл
(Удмуртский язык)
Людмила Кутянова
Кин шуиз удмурт кыл, пе, начар,
Малпанэз но уг лу чеберес вераны,
Лек дыръя кеськыны но уг лу, пе, чар-чар,
Кылдэмын, пе, со кыл лусйытэк кораны.
Калыке уно пол, тынэсьтыд визьмогес,
Ас кылын шаерзэ данъяса кырӟакуз,
Егит ныл но эшшо адӟиське мусогес,
Вордӥськем кылыныз гажамзэ веракуз.
Удмурт пи но ожын, фашистэз уллякуз,
Йыркурзэ лек умурт кылъёсын, дыр,
кисьтӥз.
Вордӥськем шаерзэ тушмонлэсь утьыкуз,
«Ой, нэнэ» шуыса, танк улэ со выдӥз.
Удмурт кыл
(Удмуртский язык)
Кузебай Герд
Котькыӵе кыл
Ас интыяз
Чебер, жингрес.
Дырыз дыръя
Котькыӵе кыл
Луэ узыр но
сэзь, жингрес.
Нош туннэзэ,
Зэмзэ ик, зэм
Удмурт кылэз
Туж ӟеч тодэм
Тужгес дуно,
тужгес кулэ
Та улонэз
ӝутны вылэ!
Кылъёс-эшъёс
(Языки-друзья)
Гай Сабитов
Пичи дыръям кылэм-адӟемъёсы –
Дымак улэп кадь суредъёс.
Ӝыны даур пыртӥ паймытыса
Тулкымъято монэ соос.
Ӟуч селое вуи ог нуналэ –
Базаразы ваиз агай.
Урамысен адӟи пичи нылэз,
Учки шораз, учки – абдрай:
Ой, кыӵе вераське со ӟуч кылын!
Ма, ку вуэм дышетскыны?
Мар ке шалтыр маде анаезлы –
Ваньмыз чик валантэм мыным.
Берло тодӥ: ӟуч кыл анай йӧлын
Лулаз – визьмаз солэн пыӵам.
Нош мон ӟучлы дыши удмурт кылын:
«Нянь – хлеб», «зор – дождь»,
«милемлы – нам».
Син азьысьтым сылмиз кадь катанчи –
Вань дуннеез усьтӥз ӟуч кыл.
Уже но улонэ мыно капчи –
Трос калыкен шедьтӥ ог кыл.