Календарь

Һуңғы битен йыртам календарҙың,

Тотош бер йыл – ҡағыҙ киҫәге.

Иртәгәһен, өр-яңы йыл тыуғас,

Бар үткәнең була кисәге!

Әммә миңә уҙған йылым булмаҫ,

Бите туҙған иҫке календарь.

Күпме һыҙланыуҙар йәндә тулай,

Япраҡ ҡоя һаман ҡайындар...

Һаран шатлыҡ,

Ғазап-ҡайғыларым

Йөрәгемә ятҡан уйылып.

Онота алырмынмы мин уларҙы

Үткәндә лә хатта ун йылым!

Тәүге көндәрендә Яңы йылдың

Һис тапмайым бер ни яңылыҡ:

Ике йылдың был ҡауышҡан төнө

Бүләк итә миңә яңғыҙлыҡ.

Һуңғы битен иҫке календарҙың

Күкрәгемә ҡыҫам ҡәҙерләп.

Йылды барлап, уның йылы көнөн

Тойоп торайымсы әҙерәк...

Фәнзил САНЪЯРОВ,

Башҡортостандың атҡаҙанған уҡытыусыһы.