ИҢ МАТУР КӨН

ИҢ МАТУР КӨН

Сентябрҙә иң матур көн —
Ул беҙҙең белем көнө.
Ошо көндө көтә-көтә
Сәскә атҡан һәр гөлө.
“Телем, Илем, Дуҫлыҡ, Ерем…”
Беҙ шиғырҙар ятлайбыҙ,
Иҫәп-хисапты беләбеҙ —
Компьютер аса серен.
“Әсәй, атай, Ватан,” — тиеп
Теҙәбеҙ матур һүҙҙәр,
Үҙебеҙсә уҡығанда
Нурланып китә йөҙҙәр.
(Ф.Ғөбәйҙуллина)

Бөгөн барлыҡ мәктәптәрҙә лә яңы уҡыу йылы башланыуын белдереп беренсе ҡыңғырау сыңланы. Йәй буйына ял итеп, көс йыйған көр күңелле, шат йөҙлө ҡыҙҙар-малайҙар йәнә мәктәп ишектәрен асты. Республика мәктәптәрендә быйыл яңы уҡыу йылы 500 меңдән ашыу уҡыусы өсөн башланды һәм 54 меңгә яҡын уҡыусыны беренсе класҡа ҡабул иттеләр.
Ҡәҙерле балалар, һеҙҙе ҙур һәм сикһеҙ белем донъяһына аяҡ баҫыуығыҙ менән ихлас күңелдән ҡотлайбыҙ, илебеҙгә кәрәкле кешеләр булып үҫеүегеҙҙе теләйбеҙ!