В.И. Ленин ис. 2-се Стәрлетамаҡ лицей-интернатының100 йыллыҡ юбилейы уҙҙы

2-се Стәрлетамаҡ лицей-интернаты – республикабыҙҙың тәүге башҡорт мәктәбе. Бынан йөҙ йыл элек етем ҡалған балалар өсөн асыла, тәүҙә Өфөлә, унан 1930 йылдан Стәрлетамаҡта эшләй.

Йөҙ йыл эсендә интернатта меңәрләгән бала уҡып сыҡҡан. Улар араһында республикабыҙҙа киң билдәле шәхестәр бар. Башҡортостандың мәғариф министры Фатима Мостафина, халыҡ шағиры Рәшит Ниғмәти, яугир шағирҙар, яҙыусылар Мөхәмәтйәров Хәй, Батыр Вәлид, Әмир Чаныш, Советтар Союзы Геройы Зөбәй Үтәғоловтарҙың исемдәре күптәргә таныштыр.

Мәктәптә уҡыу өсөн заманса шарттар булдырылған, быйыл йәй федераль программа сиктәрендә мәктәп бинаһына капиталь ремонт үткәрелде, матди-техник база яңыртылды.

Мәктәптең педагогик коллективы уҡыусыларға туған телдә белем һәм тәрбиә биреү йүнәлешендә берҙәм һәм әүҙем эшләй. Башҡорт теле һәм әҙәбиәте буйынса олимпиадаларҙа лицей уҡыусылары - алдынғылар рәтендә.

В.И. Ленин исемендәге 2-се Стәрлетамаҡ лицей-интернатын күркәм юбилейы менән ҡотлап, Дәүләт Йыйылышы - Ҡоролтайҙың фән, мәғариф, мәҙәниәт, йәштәр сәйәсәте һәм спорт буйынса комитет рәйесе Айбулат Вәкил улы Хажин, мәғариф һәм фән министры урынбаҫары Әлфиә Закир ҡыҙы Ғәлиева уҡытыусыларға дәүләт һәм ведомство наградаларын тапшырҙы.

Хөрмәтле коллегалар, һеҙҙе белем усағының күркәм юбилейы менән ҡотлайбыҙ. Артабанғы эшегеҙҙә яңы уңыштар, һаулыҡ, именлек теләйбеҙ!