«Башҡорт теле һәм әҙәбиәте йыл уҡытыусыһы - 2025» конкурсына йомғаҡ яһалды

Йылмайыуҙар, шатлыҡлы йөҙҙәр, сәскәләр, ҡотлауҙар!🌺
Ошо күркәм байрамда башҡа предмет уҡытыусылары менән бер рәттән, «Башҡорт теле һәм әҙәбиәте йыл уҡытыусыһы - 2025» конкурсына ла йомғаҡ яһалды.

Башҡортостан Республикаһының Мәғариф һәм фән министрлығы тарафынан 30-сы тапҡыр үткәрелгән бәйгелә быйыл республикабыҙҙың төрлө район-ҡалаларынан, күрше төбәктәрҙән килгән 55 педагог ҡатнашты.

24 февралдән бирле барған оло бәйгелә һөнәри яҡтан әҙерлекле, төплө фекерле, уңған, тырыш, заман менән бергә атлаған уҡытыусылар күп төрлө һынауҙар аша үтте.

«Башҡорт теле һәм әҙәбиәте йыл уҡытыусыһы - 2025 » милли мәғариф күгендә яңы йондоҙ ҡабыҙҙы! Өфө ҡалаһының Дим районында урынлашҡан 2-се республика полилингваль күп профилле «СМАРТ» гимназияһы уҡытыусыһы Наҙгөл Исмәғил ҡыҙы Хәбибуллина еңеүсе тип танылды! Йәш, талантлы, перспективалы педагог киләһе һынауҙарҙа ла алда барыр, республика мәғарифының алдынғы тәжрибәләрен башҡаларға күрһәтә алыр тип өмөтләнәбеҙ, уңыштар теләйбеҙ! Афарин!🌟👏