Радий Хәбиров туристар өсөн тағы бер иғтибар үҙәге асырға вәғәҙә итте

«Шишмә районындағы Хөсәйенбәк кәшәнәһе һәм уға яҡын биләмә — Евразия күсмә цивилизациялар музейын булдырыу буйынса проектыбыҙҙың мөһим өлөшө, — тип уртаҡлашты республика Башлығы. — Был мосолмандар, республикабыҙ халҡы һәм ҡунаҡтары өсөн ысын мәғәнәһендә изге урын.

Алдараҡ вәғәҙә иткәнсә, уны тәртипкә килтерәсәкбеҙ. Беренсе аҙымдарҙы яһай башланыҡ».

Радий Хәбиров билдәләүенсә, иң мөһиме — мәҙәни мираҫ объектын ҡотҡарыу, бында аварияға ҡаршы эштәр үткәреү, кәшәнәнең һәм таш ҡәбер таштарының емерелеүен булдырмау.

«Алла бирһә, төбәктә тағы бер туристарҙы йәлеп итеү урынын асасаҡбыҙ», — тип йомғаҡланы Республика Башлығы.