Мустай Карим – сюлэмен (Мустай Карим– в сердце моём)

Произведениын возьматэмын война вакыт. Куать аресъем башкир пи Ямиль ялан вите атаезлэсь ожмаськонысь бертэмзэ. Нош атаез Украинаысь одӥг гуртын фашистъёслэсь гур пушкы ватӥськыса кылем пичи нылашез Оксанаез шедьтэ. Собере сое  Башкирие аслаз вордӥськем гуртаз поездэн келя. Ямиль чик уг вала ӟуч кылэз, нош Оксана – башкир кылэз, озьы ке но соос эшъясько, сузэрен вын кадь луо…

Фильм мыным кельшиз. Режиссёр Александр Галибин быгатыса пуктэм, Мустай Каримлэсь произведениезлэсь кылбурет шӧмзэ со фильмын возьматыны быгатэм. Ямильлэсь рользэ Уфаысь пияш Арслан Крымчурин, Оксаналэсь – Марта Тимофеева усто шудо.

Мустай Карим но Башкортостан Элькун одӥг арын вордӥськемын. Дауръем юбилейзылы соос ог-огзылы усто кузьым дасяллям. Башкортостанысь калыкъёсын ӵош та фильмез быдэс Россиын учкизы.

Фильмез учкеме бере тодам вайи Мустай Каримен пумиськемме. 1986-тӥ арын толсур толэзе Удмуртиын советской литературалы сӥзем нуналъёс ортчизы. Элькунамы трос тодмо писательёс лыктӥзы.  Соос пӧлын Мустай Карим но вал. Соку мон «Советской Удмуртия» газетлэн редакцияз культурая ёзэтаз ужай. Ми дано куноослэн ужъёсынызы литературалы сӥзем «Италмас» бам поттӥм. Отын Мустай Каримлэн «Долгое-долгое детство» повестьысьтыз люкетэз печатламын вал. Удмурт кылэ мон берыктӥ.

Одӥг нуналэ дано землякеным пумиськыны но солэсь интервью басьтыны «Центральная» гостиницае мынӥ. Тодматским. Башкириысь луэмме тодыса, со шумпотӥз, юалляськыны кутскиз.

– Бурай ёросэз тодӥсько. Отчы кӧня ке пол ветлӥ, – шуиз Мустафа Сафич. – Тӥляд ёросты монэ Вылӥ Кенеше депутатэ бырйылӥз.

Интервьюэз вакчигес луиз, малы ке шуоно Мустай Карим аэропортэ кошкыны дасяське ни вал. Пичи магнитофонэн (соку диктофонъёс ӧй вал на) лыктэмелы земляке шумпотӥз: кема ӝегатсконо уз луы, пе. Кӧня ке вераськеммы бере мон дипломатысьтым Мустай Каримлэсь «Долгое-долгое детство» книгазэ поттӥ, писательлы автограф гожтыны курыса вазиськи.

Тани со кыӵе ке кылъёс гожтэ. Огвакытэ дугдӥз но шорам учкиз:

– Мон пересь адями ни, мыным городдылэн вуж нимыз ик кельше, соин ик Ижевск шуыса гожто, ява, – вераз калык кылбурчи.

– Яралоз, – соглаш кариськи мон. Со аре шоркармы Устинов нимын «ветлэ» на вал. «Моему земляку Ульфату Шайхутдиновичу с добрыми пожеланиями в память нашей встречи в Ижевске. Мустай Карим. 10.12.1986 г.» – тӥни сыӵе кылъёс гожтыса кельтӥз. Соку солы 67 арес вал. Нош мыным 30 арес тырмиз. Калык кылбурчиен одӥг пол гинэ пумиськеме весяклы сюлмам  кылиз. Гожъяськыны мылкыдме но со ӝутӥз. Тани  ачим но Мустай Каримлэн аресаз вуи. Алигес Удмурт Элькунлэн калык писателез луи. Мар вераз вал Мустафа Сафич соку, интервью сётыкуз, мынам сюлмылы, мылкыдылы та вакытэ эшшо но дуно, матын потэ. Зэмзэ но, мӧйымыса аслэсьтыд лыдӟисьёстэ золгес дунъяны кутскиськод. Писательлэсь гожъямъёссэ зэмос дунъясьёс ӵапак соос луо

Куамын тямыс ар талэсь азьло ортчем пумиськонысь Мустай Каримлэн интервьюэныз тӥледыз но, туала лыдӟисьёс, тодматэме потэ.

– Мустафа Сафич, мар бордысен гожъяськыны кутскиды? Кыӵе учыр, адями юрттӥз Тӥледлы творческой сюрес  вылэ султыны?

– Таӵе юанэн мыным вазиськылӥзы ни.  Мон солы валэктон сётӥсько юанэн ик: «Тӥ тодӥськоды на-а  асьтэлэсь кырӟаны кутскемдэс?» Адями уг тоды со сярысь. Писатель но аслэсьтыз творческой сюресэзлэсь кытысен кутскемзэ вераны шугъяське. Сюлэмыдлэсь кырӟаны ӧдъямзэ шӧдыны шуг.

Зэм, тросэз поэтъёс тодо ку нырысетӥ кылбур гожтэмзэс. Творческой сюрес солэсь азьвылгес кутске, дыр, малы ке шуоно произведение гожтон понна мылкыд кулэ. Нош мылкыд соку ик уг кылды. Али ке но син азям пуктӥсько 1934-тӥ арысь декабрез. Со нуналэ ауламы вуиз Кировез виемзы сярысь ивор. Соку вань калык куректӥз. Со учыр сюлэмме бугыртӥз. Ӧй чида кылбур гожтытэк. Гожъяськон мылкыды кемалась вал ни угось.

Нырысетӥ кылбур сборнике 1938-тӥ арын потӥз. Мыным соку 19 арес вал. Война азьын эшшо одӥг книгае лыдӟисьёс кие вуиз. Солы «Тулыс куараос» ним сётӥ. Со вакытэ шӧдӥське ни вал войналэн матэктэмез. Сборникелэн нимыныз, кылбуръёсыным возьматыны тырши войналы пумит луэмме.

– Войналэсь азьвыл ик Тӥ гожтӥды вал пуляен пасям комсомол билет сярысь кылбур. Нош ожмаськон дыръя тушмон чалеп асьтэлэсь комсомол билеттэс но писатель луэмды сярысь удостоверенидэс пасяса мертчиськиз гадяды. Та учыръёс чакламтэ шорысь луизы-а яке ог-огенызы кызьы ке герӟаськемын-а?

– Улонын ваньмыз ог-огеныз герӟаськемын.  Куддыръя со гердъёсты асьмеос ум адӟиське.  Та учыръёс но ог-огенызы герӟаськемын, шуыны луэ. Войналэсь азьвыл мынам идеалэ кышкасьтэм, Родиназэ юн яратӥсь комсомолец вал. Пусъеме потэ: адямилэн идеалэз адями ик луэ. Комсомол билет сярысь гожтыкум, мон син азям пуктыны тырши аслэсьтым идеалме. Война дыръя луэм учыр монэ аслам идеалэлы кӧнялы ке но матын кариз. Ӟеч тодӥсько на миналэсь пуштэмзэ. Фомин лейтенантэз со пыд йылысьтыз погыртӥз но югыт дуннелэсь люкиз. Бӧрысьгес Фомин эше сярысь кылбур гожтӥ. 1955-тӥ арын сое ӟуч кылын печатламзы бере  Фоминлэн анай-атаез, кышноез мыным гожтэтъёс ысъяны кутскизы. Бырем эшелэн внукъёсыз но табере мыным гожтэтъёс гожъяло. Война улэ на калыклэн визьмаз, йыраз, сюлмаз. Сое вунэтыны уг яра.

Творчествоын но витьымтэ, чакламтэ шорысь номыр уг кылды. Тужгес но сюлэмыд косэмъя ужаку.

– Тӥ Удмуртие вуиды нырысьсэ. Удмурт писательёсын талэсь азьвыл кыӵеесь вал кусыпъёсты? Ми тодӥськом, Тӥ пумиськылӥды вуоно удмурт артистъёсын Уфаысь культурая институтын дышетскыкузы. Мар верасалды со сярысь?

– Мон трос пол пумиськылӥ Флор Васильевен. Сое вунэтыны уг быгатӥськы. Зэмзэ но, со туж визьмо кылбурчи вал. Жаль, улонысь со дырызлэсь вазь кошкиз. Флор Васильев весяклы кылиз егит, задор мылкыдо, лякыт сямо. Удмурт калыклэн одӥгез усто пиез вал со. Мыным кельше удмуртлэн сюлмысь тыршемез, лякыт сямо луэмез. Башкир калыклы удалтэм – усто бускель сюрем.

Уфаысь культурая институтын удмурт труппаен мон кык пол пумиськылӥ. Синмаськи мон соку удмурт пиослы но нылъёслы. Соос ӝутскем мылкыдын шудӥзы мынэсьтым  «В ночь лунного затмения» пьесаме.

Асьмеос ог-огмылы кӧня ке вамышын гинэ улӥськом, нош литература кусыпъёсмы лябесьгес на. Оскисько: азьланьын кусыпъёсмы юнмалозы.

– Тӥледыз, Мустафа Сафич, ӟеч тодо ни асьме странаын но, кунгож сьӧрын  но. Сыӵе дан уг люкеты-а?

– Али мон со сярысь уг малпаськиськы. Монэ сюлэмшугъяськытэ мукетыз – кызьы пумитало гожъямъёсме лыдӟисьёс.  Егит дыръя малы ке но лыдӟисьёс сярысь ӧжытгес малпаськиськод. Али ӟеч тодӥсько аслэсьтым лыдӟисьёсме, соослэсь куронъёссэс. Азьвыллэсь лябгес гожъяськыны правое ӧвӧл. Творчество удысын кыӵе ке вырйылэ тубыны секыт ӧвӧл, секытгес отын возиськыны. Тӥни мар сюлэмшугъяськытэ монэ.

Зэм, лыдӟисьёслэн куронъёссы будо. Соосты тодон понна ӵемгес ветлоно пумиськылонъёсы. Писатель котьку луыны кулэ улонлэн азьпал радаз. Нош со бӧрсьын оскымон лыдӟисьёсыз мед сылозы.

                                                            Мустай Карим

                             Та кырӟанэз анай кырӟаз

Та кырӟанэз анай кырӟаз,

Монэ кияз веттакуз.

Та кырӟанэз анай кырӟаз,

Сюрес вылэ келякуз.

Та кырӟанэз анай кырӟаз –

Люкиськимы кемалась…

Но со куара али ке но

Сюлэмылы укыр дуно.

«Тылгизьыед пӧрмоз тыллы –

Тодэ калык,

Кысӥз ке нош юг тылгизьы,

Пӧрмоз пеньлы.

Шапык вӧзы шапык усёз –

Пӧрмоз зарезь,

Шапык усиз ке нош оген,

Куасьмоз ӝоген.

Лёге паськыт сюресэз но

Дэмен калык,

Оген лёгем сюресэз нош

Турын согоз.

Лудын сяськаос пишто ке –

Ушъя калык.

Нош сяська огназ будэ ке,

Быроз, куасьмоз.

Нокыӵе данэз уд шедьты

Огшоры гинэ.

Лек тӧлъёс куасалтозы, дыр,

Эшъёстэк тонэ.

Зарезьын гинэ уз куасьмы

Оген ву шапык.

Сюресэз медаз согы

Вож-вож жаг турын!»

Та кырӟанэз анай кырӟаз,

Монэ кияз веттакуз.

Та кырӟанэз анай кырӟаз,

Сюрес вылэ келякуз.

Берыктӥз Татьяна Харисова.