МИНЗӘЛӘ ШӨҒӘЙЕПОВА ижады

МИНЗӘЛӘ ШӨҒӘЙЕПОВА ижады

Ике йыл ғына һөнәре буйынса уҡытыусы булып эшләһә лә, хәҙер инде хаҡлы ялдағы Минзәлә Шөғәйепова килер быуынды илһөйәрлек рухында тәрбиәләүҙән туҡтамай. Комсомол, партия, Учалы хакимәтендә, тау-байыҡтырыу комбинатында эшләгән йылдарында ла тормош мәғәнәһе, йәшәйеш рәүешен йәмләү, тыуған яҡты, илде, телде яратыу һәм һаҡлау тураһында тәрән йөкмәткеле шиғырҙар ижад итә.

ҠОЛОНСАҠ

Айғылдап айғыр кешнәне

Өҙөлгәнсе ыңғырсаҡ

Айтай баҫып атлап киткәс

Болонда бер ҡолонсаҡ.

Юрға булып юртыр бер саҡ

Елберҙәтеп ялдарын -

Кәкүк айында яңыртам

Айҙынлы хыялдарым.

Үҫә төшкәс шәп айғырсаҡ

Булыр йүгерек ябаға -

Эх, бәхетле саҡтары шул,

Тояҡтарҙа юҡ даға!

Ҡырҡмыш тай ҙа булыр шунан,

Өс йәшендә ул - ҡонан,

Дүрт йәшендә - шәп дүнән.

Үҙ өйөрөн төштә күреп

Уянырмы йоҡонан?!

Ул сағында айғыр бит ул,

Хатта өйөр айғыры!

Биш йәшендә - аҙау айғыр,

Ауыҙға май яуғыры!

...Ниндәй яҙмыш инселәнгән?

Йортта ул йөк тартырмы,

Бәйгеләрҙә гел сабырмы?!

Уйҙарым, һин сабырмы?!

Айғылдап айғыр кешнәне

Өҙөлгәнсе ыңғырсаҡ

Айтай баҫып атлап киткәс

Болонда бер ҡолонсаҡ.

ЙОНДОҘЛО КИСТӘ

Ай ҡыҙының силәгенән түгелепме,

Сайпылыпмы ҡалған тамсылар,

Күңел күктәремә йондоҙ булып сәсрәп,

Хистәремде моңда ҡамсылар.

Беҙ бәхетле кистәр,

Моң һуғарған хистәр

Ете хыял менән семәрләп

Һаман нурлай әле күңел көмбәҙҙәрен,

Хәтер күперҙәрен селтәрләп.

Күккә баҡһам берсә һаҙағайҙар уйнай,

Берсә йондоҙ яуа ишелеп -

Асмандарға йөрәк үҙе һибә йондоҙ

Һағышлы бер моңдан сиселеп...