Яңы китап сыҡты, һөйөнсө!!!

Зөбәйҙә Миңнулла ҡыҙы Исламова (Дәүләтҡолова) 1963 йылдың 13 февралендә Дәүләкән районының Дүртөйлө ауылында донъяға килә. Башланғыс белемде тыуған ауылында ала, аҙаҡ район үҙәгендәге һигеҙ йыллыҡ интернат -мәктәпте тамамлай. 1978 йылда Өфөләге полиграфистар училищеһында китап тышлаусы һөнәрен үҙләштергәндән һуң, Башҡорт дәүләт университетының филология факультетында, ситтән тороп Өфө дәүләт нефть техник университетында уҡый.

"Аҡбуҙат" журналында эшләй башлағас, ижад менән ныҡлап шөғөлләнә, кескәй балалар өсөн шиғырҙар, хикәйәләр, әкиәт-йомаҡтар, пьесалар яҙып, уларҙы республика матбуғатында баҫтыра. Быйыл уның кескәйҙәр өсөн "Күнәкле болот" тигән китабы донъя күрҙе.

КҮНӘКЛЕ БОЛОТ

Килгән болот күнәк тотоп

Һыуҙары тулып аға.

Тамсылары “тып-тып” килеп

Ерҙең саңдарын ҡаға.

Йылы тамсыға шатланып

Умырзаялар ҡалҡа.

Бөрөләнә тал-сыбыҡтар,

Ҡайындар таға алҡа.

Таҙарына бар тирә-яҡ,

Күҙәтә болот күктән.

Күләүектә күгәрсендәр

“Ситек” йыуалар күптән.

Һыуы бөткәс уңған болот

Әллә ҡайҙа юғалды?

Ҡояш нурында сағылып

Йәйғор — көйәнтә ҡалды.

БЕРЕНСЕ ҠЫҢҒЫРАУ

Гөрләп тора бөгөн урам,

“Сыр-сыу” килә балалар,

Белем көнө байрамына

Ашҡынышып баралар.

Әйтерһең дә, игеҙәктәр,

Кейемдәре бер иштән

Ҡыҙҙарының сәстәренә,

Гүйә, күбәләк төшкән!

Ә малайҙар, һис сер бирмәҫ,

Атлайҙар сабыр ғына

Тулҡынланған йөрәктәре —

Аттарҙай сабыр ғына.

Йөҙҙәрендә шатлыҡ уйнай,

Күҙҙәре осҡон сәсә.

Яратҡан уҡытыусыһына

Алғандар бүләк — сәскә.

Ҡыңғырауҙың беренсеһе,

Билдәләй уҡыу йылын,

Сихри көйләп “Ҡыңғыр-ҡыңғыр”

Саҡыра ҡыҙын-улын!

 

УҠЫУСЫ РӘЖӘП

Бүлмә балҡый сын яһауҙай,

Иҙәндә юҡ бер сүп тә.

Кәштә буйлап теҙелгән

Сандали ҙа, итек тә.

Салбар, күлдәк, ойоҡбаш та

Урынында, тәртип бар.

Өҫтәлдә лә яңы хужа,

Урынлашҡан — Әлифба!

Атай, әсәй аптырашта:

“Нимә булған, ни ғәжәп”?

— Мин бит хәҙер уҡыусы! — тип

Яуаплай тапҡыр Рәжәп.