Кескәй “Аҡбуҙатҡа” – 30 йыл!

Кескәй “Аҡбуҙатҡа” – 30 йыл!

«Аҡбуҙат» — мәктәпкәсә һәм башланғыс синыф уҡыусылары йәшендәге балалар өсөн айлыҡ әҙәби-нәфис журнал. Иң тәүҙә 1989 йылдың майында «Ағиҙел» журналында ҡушымта булараҡ «Бәпембә» исеме менән сыға башлай. Артабан айырым бер баҫма булып 1990 йылда ойошторола, тәүге һаны 1991 йылдың 25 ғинуарында донъя күрә. Журналды ойоштороусы һәм беренсе баш мөхәррире — Башҡортостандың халыҡ шағиры Факиһа Туғыҙбаева тәғәйенләнә, һәм уның яуаплы сәркәтибе булып хәҙерге "Башҡортостан уҡытыусыһы" журналының баш мөхәррире Салауат Кәримов эш башлай.

2010 йылдан журналдың баш мөхәррире итеп шағирә Тамара Искәндәриә тәғәйенләнә. Тап шул осорҙа журнал күп тапҡырҙар Мәскәүҙә үткән «Матбуғаттың алтын фонды» халыҡ-ара күргәҙмәһендә иң шәп баҫма булараҡ билдәләнә. 2012 йылда «Аҡбуҙат» Рәсәй Журналистар союзы ойошторған илдең кескәйҙәр өсөн сығарылған баҫмалары араһында «Бәләкәй принц» Бөтә Рәсәй конкурсы еңеүсеһе була.

2020 йылдың июненән баҫманы шағирә Лариса Абдуллина етәкләй. Үткән йылдың сентябрендә «Аҡбуҙат» Башҡортостан Башлығы грантына «Урал батыр» йәнһүрәтен сығара. Ошо уҡ йылда Рәсәй Федерацияһының Пермь өлкәһендә йәшәгән Ғәйнә ырыуының кескәй башҡорттары өсөн 13-сө һан нәшер ителә. Башҡорт теле йылында редакция хеҙмәткәрҙәре республиканың ике дәүләт телендә «Ҡояш ҡыҙы иленән» китабын баҫтырыуға өлгәшә. Был баҫмала кескәйҙәрҙең һәм уҡыусыларҙың башҡорт телендә яҙылған шиғырҙары рус теленә тәржемә ителгән. Йыйынтыҡҡа 40 әҫәр ингән. Бөгөн журналда балалар яҙыусылары Миңлегөл Тайсина, Зөбәйҙә Исламова, Гөлнара Мостафина, йәш быуын шағирәһе Айгөл Йәмилева эшләй. Кескәйҙәр өсөн сағыу һәм тәрбиәүи әһәмиәткә эйә булған һүрәттәрҙе республикала ғына түгел, Рәсәйҙә билдәле рәссамдар Азамат Ғарипов, Сулпан Билалова, Майя Ҡәйүмова, Артур Вәсилов, Салауат Ғиләзетдинов, Лиана Ниғмәтйәнова, Сергей Эйтвид, Ирина Әхмәҙуллина, Дамир Мөхәмәтйәров төшөрә.