“Башҡорт теле һәм әҙәбиәте йыл уҡытыусыһы – 2024” регион-ара конкурсының асыу тантанаһы үтте

Алдынғы педагогик тәжрибәне таратыу, уҡытыусы һөнәренең дәрәжәһен күтәреү, иң яҡшы уҡытыусыларҙы асыҡлау һәм туған тел уҡытыусыларының абруйын үҫтереү маҡсатында ойошторолған конкурстың географияһы йылдан-йыл киңәйә, ҡатнашыусылар һаны арта.

Быйылғы һөнәри бәйгелә барлығы 55 уҡытыусы ҡатнаша. Уларҙың бишеһе күрше Силәбе, Ҡурған өлкәләре һәм Ханты-Манси автоном округынан булһа, биш уҡытыусы - һөнәри белем биреү ойошмаларынан. Еңеүсе исеменә быйыл 54 ҡатын-ҡыҙ һәм бер ир-егет дәғүә итә.

Иң күп педагогик стажлы конкурсант – Ҡәләмова Ләлә Фоат ҡыҙы, Краснокама районынан. Уның дөйөм педагогик стажы – 39 йыл.

Ә иң йәш конкурсант - Насырова Зөлхизә Рәил ҡыҙы. Ханты-Манси автоном округының Сорғот ҡалаһынан. Эш стажы 2 йыл.

Конкурсанттарыбыҙға рух ныҡлығы, күңел күтәренкелеге, ярыш сәме теләйбеҙ!

“Башҡорт теле һәм әҙәбиәте йыл уҡытыусыһы – 2024” регион-ара конкурсы эшлекле фекер алышыуға, ижади асыштарға юл асһын!
Сығанаҡ: Милли мәғариф буйынса ресурс үҙәге.