Уҡытыусыларҙың һәйкәл китабы

Сараға әҙибәнең үҙе уҡытҡан уҡыусылары, уның ижадын яратҡан билдәле шәхестәр, яҙыусылар, артистар йыйылған ине.

– Кисәгә мин дә ҙур тулҡынланыу менән килдем, сөнки бөгөнгәсә балалар йорттарында ғүмерҙәрен ата-әсә ҡурсыуынан мәхрүм булған етем сабыйҙарҙы тәрбиәләүгә арналған тәрбиәселәр хеҙмәтенә дөрөҫ баһа биргән яҙмалар булманы.
Бөгөн төплө фекерҙәр менән тулы, педагогтар өсөн методик ҡулланма булырлыҡ китаптың донъя күреүе – оло шатлыҡ.
Китаптың һәр һөйләме йөрәк аша үтеп инә, һәр һүҙе шул тиклем тәрән мәғәнәле, яҙыусының оҫталығы ғәжәпләндерә лә, һоҡландыра ла, – тине барлыҡ ғүмерен етемдәр йортонда балалар тәрбиәләүгә бағышлаған тәрбиәсе Флизә Ниғмәтуллина.

«Уҡытыусы бәхете» китабы – тормош, кеше яҙмыштары хаҡында уйландыра торған китап. Уҡытыусылар өсөн генә түгел, барлыҡ ата-әсәләргә лә бик фәһемле әсбап ул.