«Муха» анимация студияһы «Союзмультфильм» менән килешеү төҙөнө

Кластер составына Өфө сәнғәт училищеһы, «Муха» студияһы һәм Әмир Абдразаҡов исемендәге «Башҡортостан» киностудияһы инә. Производство базаһы белгестәргә практик тәжрибә туплау, ҙур проекттарҙа ҡатнашыу һәм профессиональ эшмәкәрлеккә әҙерләнеү мөмкинлеген бирә. Бында практик күнекмәләр үҙләштереү, ҙур проекттарҙа ҡатнашыу һәм профессиональ карьераға әҙерләнеү өсөн тәғәйенләнгән заманса ҡорамалдар менән 80 эш урыны булдырылған.

Радий Хәбиров һәм ҡунаҡтар кластерҙың бер өлөшө булған Өфө, Сибай һәм Стәрлетамаҡтың Креатив индустрия мәктәптәре эше менән танышты. Был учреждениеларҙа башланғыс белем бирелә, артабан уҡытыу колледждарҙа һәм училищеларҙа дауам итә.

Кластер мөмкинлектәре менән танышыу сиктәрендә шулай уҡ «Петрушка» һәм «Салауат тоҡомдары» йәнһүрәттәре тизерының презентацияһы үтте. Был проекттар буйынса барлыҡ эштәр ҙә Өфөлә башҡарылған.

«Муха» анимация студияһы директоры Артур Абдрахманов анимация продукттарын булдырыу өсөн дәүләт ярҙамының әһәмиәтен һыҙыҡ өҫтөнә алды.

– Республика Башлығының иғтибары ярҙамында беҙ Рәсәйҙә генә түгел, донъя кимәлендәге анимация фильмдары ла төшөрә алабыҙ. Коллегаларыбыҙ алдында эштәребеҙ өсөн оят түгел. Киң прокатка әҙерләнәбеҙ, – тине Артур Абдрахманов.

Бынан тыш, кластер майҙансығында «Союзмультфильм» киностудияһы менән «Муха» студияһы араһында хеҙмәттәшлек тураһында килешеүгә ҡул ҡуйылды. Уларҙың берлектәге эше «Петрушка» тулы метражлы йәнһүрәтен төшөрөүгә йүнәлтеләсәк. Шулай уҡ «Муха» Мәскәүҙә «Союзмультфильм» технопаркында үҙ вәкиллеген аса.

«Союзмультфильм» киностудияһының генераль директоры Борис Машковцев, Башҡортостанда анимацияны үҫтереүгә айырыуса иғтибар бүленә, тип һыҙыҡ өҫтөнә алды.

– Республика етәкселегенә ярҙамы өсөн ҙур рәхмәт. Биш йыл элек төбәк Башлығы Радий Фәрит улы Хәбировтың саҡырыуы буйынса идеяларҙы әҙерләй башланыҡ, һәм бөгөн инде берлектәге проекттар өҫтөндә эш башланыуы хаҡында һөйләй алабыҙ, – тип билдәләне Борис Машковцев.