Милли инновацион һәм күп профилле полилингваль мәктәп директорҙары йыйылды

Башҡорт, татар, мари, удмурт, сыуаш телдәре тәрәнәйтеп өйрәнелгән уҡыу йорттары етәкселәренә факультет хаҡында мәғлүмәт биреү - бик кәрәкле ғәмәл, тип билдәләй Өфө фән һәм технологиялар университетының Башҡорт филологияһы, шәрҡиәт һәм журналистика факультеты деканы Гөлфирә Абдуллина. - Республиканың мәғариф һәм фән министрлығы ойошторған форумда ҡатнашыусы директорҙарҙың күптәре менән яҡындан танышбыҙ, беҙҙең тығыҙ хеҙмәттәшлек йылдар буйы дауам итә. Ике яҡ өсөн дә отошло аралашыу был, сөнки мәғариф усаҡтарының алдынғы етәкселәре үҙҙәренең сығарылыш класс уҡыусыларының ҡайһы уҡыу йортона барырын, ниндәй йүнәлеш һайларын әленән үк хәстәрләй.